İctimai Televiziya və Radio Yayımları Şirkəti: Gələn ildən Azərbaycanda Nəqliyyatın İntellektual İdarə Edilməsi Sisteminin tətbiqinə başlanacaq 

Gələn ildən Azərbaycanda Nəqliyyatın İntellektual İdarə Edilməsi
Sisteminin tətbiqinə başlanacaq
================================================================================
Füzuli Məcidli on 12 Mart, 2010
 
Bunu Azərbaycana səfərinin yekunlarına dair keçirdiyi mətbuat
konfransında deyən Koreyanın torpaq, nəqliyyat və dəniz işləri naziri
Yonq Huan Çunq Xəzər dənizi üzərindən inşa ediləcək körpünün də
Koreya şirkətləri tərəfindən həyata keçiriləcəyini bildirib.
Cənubi Koreya Azərbaycanla nəqliyyat sahəsində əməkdaşlığı daha da
dərinləşdirmək niyyətindədir. Bunu deyən Koreyanın torpaq, nəqliyyat
və dəniz işləri naziri Yonq Huan Çunq Bakıya Azərbaycanın ekologiya və
təbii sərvətlər nazirinin dəvəti ilə səfər etdiyini və başçılıq
etdiyi nümayəndə heyətin bir sıra işgüzar görüşlər keçirdiyini
vurğuladı.
Yonq Huan Çunq: Azərbaycan prezidenti ilə görüşümdə ona Koreya
prezidentinin səfər dəvətini çatdırdım. Çalışacağıq ki, ölkələr
arasında əlaqələri gücləndirmək üçün dövlət başçılarının
qarşılıqlı səfərlərinin təşkilini sürətləndirək.
«Bakı körfəzi dəniz körpüsü Layihəsi»nin layihə sənədlərinin
hazırlanması üçün 1 milyon 600 min dollar dəyərində qrant sazişi
imzalandığını bildirən nazir Bayıldan Zığadək körpünün nə vaxt
tikiləcəyinin hələlik məlum olmadığını dedi. Yonq Huan Çunq qeyd etdi
ki, hazırda Koreya şirkətləri Azərbaycanda avtobuslarla təchizat,
Nəqliyyat Əməliyyatlarının İntellektual İdarə Edilməsi Sisteminin
yaradılması və digər layihələrdə də iştirak edir.
Yonq Huan Çunq: Ötən ildən başlanmış Nəqliyyat Əməliyyatlarının
İntellektual İdarə Edilməsi Sistemi üçün mərkəzin tikintisi prosesi
uğurla davam etdirilir. Mərkəz 2011-ci ilin aprel ayında istifadəyə
veriləcək.
Nazir regional bazarın təhlil olunduğunu və müvafiq nəticələr əldə
olunarsa, Koreya şirkətlərinin Azərbaycanda avtomobil istehsalına başlaya
biləcəyini də istisna etmədi. Koreyalı nazir hazırda üzərində iş
aparılan layihələrdən birinin də Azərbaycanın mövcud dəmir yolunun
təkmilləşdirilməsi və sürətin artırılması ilə bağlı olduğunu qeyd
etdi.