İctimai Televiziya və Radio Yayımları Şirkəti: Rəsmi xronika 

Rəsmi xronika
================================================================================
Natiq Aliyev on 08 Sentyabr, 2010
 
Prezident İlham Əliyev Amerika Birləşmiş Ştatları Dövlət katibinin
Cənubi Qafqaz regionu  üzrə müşaviri Tina Kaydanovu qəbul edib.
Görüşdə Azərbaycanla Amerika arasında ikitərəfli əlaqələr,
Ermənistan-Azərbaycan Dağlıq Qarabağ münaqişəsi ilə bağlı
danışıqlar prosesinin gedişi, eləcə də digər məsələlər ətrafında
fikir mübadiləsi aparılıb. **Prezident İlham Əliyev Niderland Krallığı
Senatının prezidenti Rene van der Lindenin başçılıq etdiyi nümayəndə
heyətini qəbul edib. Qonaq Azərbaycana yenidən səfər etməsindən,
dostluq münasibətlərimizin və çox yaxşı əlaqələrimizin olmasından
məmnunluğunu bildirib. Avropa Şurası Parlament Assambleyasının
prezidentliyindən sonra Azərbaycan-Niderland dostluq qrupuna rəhbərlik
etdiyini vurğulayan Rene Van der Linden senatın prezidenti kimi də
Azərbaycanla əlaqələrə böyük önəm verdiyini deyib. Prezident İlham
Əliyev  Rene van der Lindenin vaxtilə Azərbaycan-Niderland dostluq  qrupuna
sədrlik etməsini yüksək dəyərləndirib. Dövlət başçısı
Azərbaycanla Niderland Krallığı arasında siyasi, iqtisadi və digər
sahələrdə əlaqələrin daha da genişlənəcəyinə ümidvar olduğunu qeyd
edib. Əməkdaşlığın inkişafı üçün yaxşı potensialın olduğunu
vurğulayan prezident Rene van der Lindenin Azərbaycana bu səfərinin iki
ölkə arasında münasibətlərin daha da möhkəmlənməsi işinə töhfə
verəcəyinə əminliyini bildirib.