İctimai Televiziya və Radio Yayımları Şirkəti: Azərbaycan işğal olunmuş ərazilərlə bağlı BMT-yə müraciət edəcək 

Azərbaycan işğal olunmuş ərazilərlə bağlı BMT-yə müraciət edəcək
================================================================================
Füzuli Məcidli on 11 Mart, 2010
 
Rəsmi Bakı narkotik vasitələrin tranziti üzrə Əfqanıstan-İran-işğal
olunmuş Dağlıq Qarabağ marşrutunun BMT-nin siyahısına salınmasını
tələb edəcək. Bunu deyən Baş nazirin müavini Əli Həsənov hesab edir
ki, Azərbaycanın işğal altındakı əraziləri müəyyən dövlətlər və
beynəlxalq təşkilatların nəzarəti altındadır. Ölkəmiz BMT-nin
Vyanadakı ofisinə həmin torpaqlarda bu istiqamətdə monitorinq
keçirilməsininə dair müraciət etsə də, Ermənistan qurum
əməkdaşlarını əraziyə buraxmayıb.
BMT-nin hesabatına görə, son 2 ildə narkotik vasitələrin istehsalı və
istifadəçiləri azalıb. Lakin vəziyyət yenə də ürəkaçan deyil.
Təəssüf ki, Azərbaycanda da bu istiqamət də çatışmazlıqlar
mövcuddur. Ötən il ölkəmizdə 2185 nəfər narkotik maddə istifadəçisi
qeydə alınıb. Xəstələrin ümumi sayı isə 23 927 nəfərdir. Onların
arasında 5 məktəbli və 498 qadın da var. Bu barədə Nazirlər
Kabinetində keçirilən narkomanlığa və narkotik vasitələrin qanunsuz
dövriyyəsinə qarşı mübarizə üzrə Dövlət Komissiyasının iclasında 
məlumat verildi. Təklif olundu ki, dünyada narkotik istifadəçilərinə
cinayətkar yox, xəstə kimi baxılmalıdır tendensiyası Azərbaycanda da
nəzərdən keçirilməlidir. Baş nazirin müavini, komissiyanın sədri Əli
Həsənov Azərbaycan ərazisi vasitəsilə narkotik vasitələrin tranziti
üzrə 3 -Əfqanıstan-İran-Azərbaycan, Əfqanıstan-Pakistan-İran,
Əfqanıstan-Orta Asiya-Azərbaycan marşrutlarının BMT-yə məlum olduğunu
dedi. Rəsmi Bakı Əfqanıstan-İran-işğal olunmuş Dağlıq Qarabağ
marşrutunun da bu siyahıya daxil edilməsini tələb etmək niyyətindədir.
Bəzi xarici təşkilatların sorğuları düzgün formada aparmadığını
vurğulayan millət vəkili Fuad Muradov isə bir neçə təklif irəli
sürdü. Ali məktəblərdə videokameralar quraşdırılmalı,
maarifləndirmə işlərinin daha çox internetdə aparılmasına üstünlük
verilməli, ən əsası isə ayda 20 dəqiqə olmaqla, çarxlara
televiziyalarda efir vaxtı ayrılmalıdır.
Milli Televiziya və Radio Şurasının sədri Nuşirəvan Məhərrəmli isə
televiziya kanallarının narkomaniyaya qarşı mübarizədə maarifləndirmə
işlərini peşəkar səviyyədə həyata keçirməli olduqlarına diqqət
çəkdi.
İclasda o da vurğulandı ki, aidiyyatı qurumlar bu istiqamətdə sorğuları
yalnız dövlət komissiyası ilə razılaşdırdıqdan sonra apara bilər.
Bununla bağlı həmin təşkilatlara məktub göndəriləcək.