İctimai Televiziya və Radio Yayımları Şirkəti: «Nabucco» və «Cənub axını» layihələri birləşdirilə bilər 

«Nabucco» və «Cənub axını» layihələri birləşdirilə bilər
================================================================================
Natiq Aliyev on 12 Mart, 2010
 
İtaliyanın «Eni» şirkətinin prezidenti Paulo Skaroni maliyyə
xərclərinin azaldılması məqsədilə «Nabucco» və «Cənub axını» qaz
kəmərlərinin inşası layihələrinin birləşdirilməsi təklif ilə
çıxış edib.
P.Skaroni bildirib ki, əgər layihə iştirakçıları bu iki qaz kəmərinin
birləşdirilməsinə dair ümumi razılığa gəlsələr, «Eni» şirkəti
investisiya qoyuluşunu və xərc əməliyyatlarını azalda, həmçinin
sərmayənin geri qaytarılmasını sürətləndirə bilər.
Qeyd edək ki, «Nabucco» qaz kəməri layihəsinin dəyəri 7,9 mlrd. avro
təşkil edir. Tikinti işlərinin 2011-ci ildə və qazın nəqlinin isə
2014-cü ildə başlayacağı gözlənilir. Bu qaz kəməri
Bakı-Tiflis-Ərzurum kəmərinin ardı olacaq və Xəzər qazının
Azərbaycan, Gürcüstan, Türkiyə, Bolqarıstan, Macarıstan, Rumıniya və
Avstriyadan keçməklə Avropaya çatdırılmasını təmin edəcək.
«Cənub axını» isə Novorossiyskdən (Rusiya) Bolqarıstana qazın ixrac
edilməsi üçün İtaliya və Rusiyanın birgə əməkdaşlığı ilə Qara
dənizin dibi ilə qaz kəmərinin inşası layihəsidir.