Azərbaycanda iqtisadi böhranın fəsadları elə də hiss edilmir

Əksinə indi banklar əmanətlər və faizlər hesabına ötən il yığdıqları pulları bu il hara sərf etmək üzərində düşünürlər. Ekspertlər hesab edir ki, bu il banklar öz müştərilərini ələməyə başlayacaqlar. Verilən kreditləri az-çox geri qaytaran banklar bundan sonra müştərilərini varlı olub-olmamasına görə yox, işgüzarlıq bacarığına və məsuliyyətliliyinə əsasən seçməyi düşünürlər.         

Yeri gəlmişkən, indi Azərbaycanda 142 təşkilat kredit verir. Bunlardan 46-sı bank, qalan 96-sı qeyri-bank kredit təşkilatlarıdır. Kredit almaq üçün paytaxta gəlməyə ehtiyac yoxdur – indi bankların ölkə ərazisində 626 filialı işləyir. Son bir ildə 59 filial açılıb. Filialların əksəriyyəti nəinki biznes-kreditlər, həm də istehlak kreditləri verir.