Prezident İlham Əliyev Miroslav Layçakını qəbul edib

Prezident İlham Əliyev Slovakiyanın Xarici İşlər naziri Miroslav Layçakın başçılıq etdiyi nümayəndə heyətini qəbul edib. Dövlət başçısı  Slovakiyanın Xarici İşlər nazirinin ölkəmizə ilk səfərinin  uğurlu olacağına ümidvar olduğunu bildirib və bu səfərin  Azərbaycanla Slovakiya arasında bir çox sahələrdə səmərəli əməkdaşlıq üçün  yaxşı perspektivlər açacağını vurğulayıb. Prezident İlham Əliyev bunun üçün  qarşılıqlı maraqların və yaxşı potensialın mövcud olduğunu da qeyd edib. Dövlət başçısı səfər zamanı keçirilən görüşlərin ikitərəfli münasibətlərin inkişafının əsas  istiqamətlərinin müəyyən edilməsi baxımından səmərəli olacağına əminliyini ifadə edib. Slovakiyanın Xarici İşlər naziri Miroslav Layçak  Azərbaycanın  həm regional, həm siyasi,  həm iqtisadi, həm də energetika baxımından  aparıcı dövlətlərdən biri olduğunu vurğulayıb. O, Azərbaycan Prezidentinin regionda gedən proseslərlə bağlı fikirlərinin  Slovakiya tərəfi üçün önəmli olduğunu qeyd edib. Daha sonra nazir bildirib ki, səfərinin əsas məqsədi  ikitərəfli münasibətlərin intensivləşdirilməsindən ibarətdir. Ölkələrimiz arasında siyasi əlaqələrin səviyyəsindən razılığını ifadə edən Miroslav Layçak  Slovakiya ilə Azərbaycanın  iki dost ölkə olduğunu vurğulayıb. 

Qeyd edək ki, Miroslav Layçakın Azərbaycana rəsmi səfəri çərçivəsində Bakıda ilk  Slovakiya-Azərbaycan biznes forumu keçirilib. İqtisadi İnkişaf Nazirliyinin dəstəyi, Azərbaycanda İxracın və İnvestisyiaların Təşfiqi Fodunun  və Slovakiyanın İnvestiya və Ticarətin İnkişafı Agentliyinin təşkilatçılığı ilə keçirilən biznes forumda  dövlət rəsmilərilə yanaşı, 40-a yaxın şirkət nümayəndəsi iştirak edib. Slovakiyanın xarici işlər naziri Miroslav Layçak və Azərbaycanın iqtisadi inkişaf nazirinin müavini Niyazi Səfərov çıxış edərək, iki ölkə arasında mövcud iqtisadi əlaqələr və əməkdaşlıq imkanları barədə məlumat veriblər. Bildirilib ki, Slovakiya və Azərbaycan arasında ticarət dövriyyəsi  11 milyon dollardan bir qədər artıq olsa da, bu, azdır. Ticarət dövriyyəsinin artırılması üçün kənd təsərrüfatı, informasiya texnologiyaları, bank, tikinti və sənaye sahələrində birgə əməkdaşlıq layihələri həyata keçirilə bilər.